Arlo komunitarioko zentroetan banatu dira, ekainean eta uztailean, “Larrialdian nola jokatu” gidaren 200 ale. Helburua izan da laguntza-tresna bat eskuratzea, jakiteko zer egin behar den larrialdi batean, anbulantzia etorri arte.
Eta gaian gehiago sakontzeko asmoz, Urko Blancok azalduko digu, larrialdietako zerbitzura deitzen dugunean, zein den “hariaren bestaldean” daudenen eginkizuna, zelan egiten duten lan telefonoz gidatzen gaituztenek, eta baita laguntzera etortzen zaizkigunek ere.
Urko Blanco mediku da Osakidetzako Larrialdietako Zerbitzuan. Lan egiten du Bizi Euskarri Aurreratuko anbulantzietan (UVI), helikopteroan eta larrialdietako koordinazio-zentroan. Ederto ezagutzen du, beraz, bere lan-esparrua; eta jakin daki zer den segurtasun eza sentitzea erabakiak “itsu-itsuan” hartu behar direnean, zeren larrialdi batean dagoen informazio bakarra izaten baita deia egin duen pertsonak ematen duena, eta kontuan hartu behar da askotan estu eta larri ibiltzen dela, egoerak gaindituta.
Argi dago ekintza-gizona dela, eta bereziki atsegin duela hurkoei laguntzea. Guretzat ere eduki ditu hitz gozo batzuk; baina zertaz ari naizen jakiteko, elkarrizketa osoa irakurri beharko duzue.
Eskerrik asko, Urko, zure laguntzagatik, profesionaltasunagatik, eta zure lana pixka bat gehiago jakitera emateagatik. Azken finean, lana partekatzen dugu, itsasontzi berean gaude, eta xede berbera dugu guztiok.
A.V.